"Жайлоодогу жайыт талаш". Өзгөндө атасы менен балдарына кылмыш иши козголду

Өзгөндө жайыт талашып урушкан айылдаштар боюнча кылмыш иши козголду. Бул тууралуу Ош ОИИББинен билдирди.

Маалыматка ылайык, 29-апрелде милицияга Төрт-Көл айыл аймагынын 1966-жылы туулган Н.Н. аттуу тургуну арыз менен кайрылган. Анын айтымында, 28-апрель күнү жайлоодо 1998-жылы туулган Н.уулу Б. аттуу баласы экөөнү 1964-жылы туулган М.Т. аттуу айылдашы сабап салган.

Бул факты каттоого алынып, тергөөгө чейинки текшерүү иштери башталган.

Ал эми 30-апрелде сабады делген М.Т. аттуу жаран денесинен жараат алып, ооруканага кайрылган. Ал милицияга 28-апрель күнү жайлоодо айылдашы Н.Н. эки баласы менен ур-токмокко алып, денесине жаракат келтиргенин айткан.

Бул факты дагы каттоого алынып, окуяга тиешеси бар атуулдарга соттук-медициналык экспертиза дайындалган.

"Топтолгон материалдын негизинде Н.Н. жана анын балдарынын үстүнөн Кылмыш-жаза кодексинин 280-беренеси (бейбаштык) боюнча кылмыш иши козголду. Текшерүүнүн жыйынтыгы менен жана дайындалган экспертизанын корутундусуна ылайык, мыйзамдуу чечимдер кабыл алынат", - деп айтылат маалыматта.

Милиция учурда тергөө иштери уланып жатканын кошумчалады.