Орусияда журналист Надежда Кеворкова кармалды

Журналист Надежда Кеворкованын Москвадагы батири тинтүүгө алынды. "Известия" жана "РЕН ТВ" басылмалары өздүк булактарына таянып кабарлагандай, журналистке Орусиянын Кылмыш-жаза кодексинин 205.2-беренесинин 2-бөлүгү (терроризмди ачык актоо) боюнча иш козголгон. Бул берене боюнча эң жогорку жаза жети жылга чейин эркинен ажыратуу болуп саналат.

Эки басылма тарабынан жарыяланган тинтүүнүн видеолорунда ураандар жазылган плакаттар, ошондой эле ар кандай сүрөттөр бар.

Тинтүү учурунда анын уюлдук телефону алынган жана андан кийин Кеворкова Тергөө комитетине жеткирилген.

Надежда Кеворкова - Жакынкы Чыгыш боюнча адистешкен журналист жана жазуучу. Атап айтканда, автордун негизги темаларынын бири 20 жылдан ашык убакыттан бери жигердүү чагылдырып келе жаткан Палестина-Израиль чатагы.

Ал Палестина жана Газа тууралуу бир нече китептердин, ошондой эле "Кеворкова" Телеграм каналынын автору. Мындан тышкары, Кеворкованын макалалары Орусияда тыюу салынган бир катар маалымат каражаттарында жарыяланган.