Санкт-Петербургда дарыяга кулаган автобус: ТИМ билдирүү жасады

Санкт-Петербург шаарындагы дарыяга кулап кеткен автобустун ичинде кыргызстандыктар жок. Бул тууралуу Тышкы иштер министрлиги билдирди.

"10-майда Санкт-Петербургда жүргүнчү ташыган автобус дарыяга кулап кеткен жол кырсыгында каза болгондордун жана жабыркагандардын арасында Кыргыз жарандары жок", - деп билдиришти министрликтен.

10-майда Санкт-Петербург шаарында автобустун айдоочусу автобусту башкара албай калып, Мойка дарыясына кулап түшкөн. Акыркы маалыматтар боюнча, кеминде жети киши набыт болду, дагы экөөнүн абалы оор. 44 жаштагы автобустун айдоочусу Рахматшох Курбонов кармалды, ал учурда ооруканада жатат.