Бишкекте ок атышууга шектелип тогуз адам милицияга жеткирилди

Милиция кызматкерлери ок атуу менен мушташка катышкан тогуз жигитти аныктап, тергөө кызматына алып келишкен. Бул тууралуу маалыматты бүгүн, 14-майда Бишкек шаарынын Ленин райондук ички иштер башкармалыгынан тастыкташты.

Маалыматка ылайык, кечээ, 13-майда болжол менен саат 18:26 чамасында 102 кызматына Жаш Гвардия бульвары менен Фрунзе көчөсүнүн кесилишинде мушташ болгону тууралуу билдирүү түшкөн. Анда телефон чалган адам окуя болгон жерде октун үндөрү угулганын айткан.

"Окуя болгон жерге милиция кызматкерлери барышкан. Ыкчам издөө иш-чараларынын негизинде милиция кызматкерлери тарабынан 2000-жылы туулган Р.К., 1999-жылы туулган К.Б., 2001-жылы туулган Б.Э., 1997-жылы туулган Ш.Э., 1999-жылы туулган Т.А., 2001-жылы туулган Н.А., 2007-жылы туулган П.Б., 1989-жылы туулган Ж.Т. жана 1999-жылы туулган Ж.Ж. аттуу жарандар аныкталып, тергөө кызматына алынып келинди",-деп айтылат маалыматта.

Бул факты боюнча Кылмыш-жаза кодексинин "Бейбаштык" беренеси боюнча иш козголду.

Ал эми ок атылган травматикалык тапанча экспертизага жөнөтүлүп, тергөө иштери уланууда.