Казакстанда Айбек Молдогазиев Япониянын өкүлү Масаки Икегами менен жолугушту

Тышкы иштер министринин орун басары Айбек Молдогазиев Япониянын Тышкы иштер министрлигинин Борбордук Азия өлкөлөрү боюнча атайын өкүлү, элчи Масаки Икегами менен жолугушуу өткөрдү. Бул тууралуу министрликтин маалымат кызматы билдирди.

Маалыматка ылайык, жолугушуу Астана шаарында өтүп жаткан "Борбордук Азия + Япония" диалогунун жогорку кызмат адамдарынын 16-жыйынынын алкагында өткөн.

Анда тараптар өз ара кызыкчылык туудурган тармактарда эки тараптуу кызматташуунун келечеги боюнча пикир алышып, президент Садыр Жапаровдун Японияга болгон иш сапарынын жыйынтыгы боюнча макулдашууларды ишке ашыруу убакыттарын тууралашып, биргелешкен долбоорлорду талкуулашкан.

Ошондой эле тараптар мамлекет башчы Садыр Жапаров жана Япониянын премьер-министр Ф.Кишида менен жолугушуу өткөрүү маселелерин сүйлөшүшкөн.

Жолугушуунун жүрүшүндө эл аралык маселелер боюнча дагы пикир алмашуу болгон.