Бишкекте велосипед уурдаган адам кармалды

Бишкекте велосипед уурдоого шектелип 32 жаштагы жаран кармалды. Маалыматты Свердлов РИИБи билдирди.

Ага ылайык, 9-апрелде милицияга жаран кайрылып, 17 миң сомдук велосипедин Жумабеков көчөсүндөгү көп кабаттуу үйлөрдүн бириндеги кире беришинен уурдап кетишкенин айткан. Ошондой эле белгисиз адамдарга чара көрүүнү өтүнгөн.

Аталган факты боюнча 205-берене (Уурдоо) боюнча кылмыш иши козголгон. Шектүү катары 1992-жылы туулган жаран кармалып, убактылуу кармоочу жайга киргизилди.

Тергөөдө шектүү велосипедди тапшырып берген. Мындан тышкары анын башка ушул сыяктуу кылмыштарга катыштыгы бар экени аныкталган.

Учурда тергөө иштери уланууда.