Бишкекте жогорку окуу жайлардын жетекчилери менен жыйын өттү

Бишкектин Октябрь акимиатынын башчысы Жаныбек Орозалиев райондо жайгашкан 19 билим берүү мекемесинин өкүлдөрү менен жыйын өткөрдү.

Калаа мэриясынан билдиргендей, жолугушууда борбор калаадагы чет элдик студенттер менен болгон акыркы окуя жана шаардагы окуу процессин калыбына келтирүү, туруктуулукту сактоо боюнча зарыл чаралар талкууланды. Жыйынга прокурордун орун басары жана Октябрь РИИБинин башчысынын орун басары катышты.

Анда ЖОЖдордун жетекчилигине чет элдик студенттерге түшүндүрүү иштерин жүргүзүү зарылдыгы боюнча сунуштар берилди. Прокурордун орун басары менен Октябрь РИИБинин башчысынын орун басары өлкө аймагына келген чет өлкөлүк жарандар, бул учурда студенттер иштөөгө укугу жок экенин билдирип, эгерде эмгектенген фактылар аныкталса, аларга мыйзамга ылайык чаралар көрүлөрүн баса белгилешти.

Башчы ЖОЖ өкүлдөрүнө жакында студенттерге барып түшүндүрүү иштерин жүргүзө турганын билдирди.