Эдуард Кубатов Гималайдын Лхоцзе чокусун багындырды 

Гиннесс китебине кирген, Альпинизм жана аскага чыгуу федерациясынын президенти Эдуард Кубатов Гималай тоосунун Лхоцзе чокусун ийгиликтүү багындырды. Бул тууралуу ал өзүнүн Фейсбук баракчасына жазды.

Анын айтымында, эч кандай кычкылтексиз Гималай тоосунун 8 миң 516 метр бийиктикте жайгашкан Лхоцзе чокусуна ийгиликтүү чыгышкан. Ал бул ийгиликти кыргыз элине, жерине арнай тургандыгын белгилеп өттү.

"20-майда саат 20:00дө эч кандай кычкылтек колдонбостон Гималай тоосунун 8 миң 516 метр бийиктикте жайгашкан Лхоцзе чокусуна ийгиликтүү чыктык. Жеңишти элиме, жериме жана сүйүктүү мамлекетибизге арнайм. Президентибиз Садыр Жапаровго берген сөзүмдү аткарганга аракет кылып жатабыз. Мындан тышкары бул жеңишти биздин Париждеги Олимпиада оюндарына камданып жаткан улуттук курама командыбызга арнайм. Элибиз тарыхыбызда биринчи алтын байгени чыдамсыздык менен күтүүдө. Кыргызстан алга!" - деп билдирди Кубатов.

Мындан тышкары ал буга чейинки рекордду кыргыздын көрүнүктүү альпинисттеринин бири Сергей Селиверстов койгонун, ал 8 миң 201 метр бийиктиктеги Чо-Ою чокусуна кычкылтексиз чыкканын билдирди.

Белгилей кетсек, Альпинизм жана аскага чыгуу федерациясынын президенти Эдуард Кубатов Гиннесстин рекорддор китебине кирген. Ал Гиннесстин рекорддор китебине Манаслу чокусуна кычкылтексиз чыккан эң жашы улуу эркек адам катары катталган.