Акылбек Жапаров иш сапар менен Түркмөнстанга барат

Министрлер кабинетинин төрагасы Акылбек Жапаров эртең, 24-майда өтө турган КМШ өлкөлөрүнүн өкмөт башчыларынын кеңешинин кезектеги жыйынына катышуу үчүн Түркмөнстандын Ашхабад шаарына барат.

Өкмөттүн басма сөз кызматынан билдиргендей, жыйындын күн тартибинин долбоорунда 12 маселе бар. Анын ичинде энергетика тармагындагы кызматташуу, эл аралык транспорт коридорлорун өнүктүрүү боюнча иш-чаралар планын кеңири форматта талкуулоо күтүлүүдө.

Андан тышкары жыйында саламаттыкты сактоо, химиялык өнөр жай, кооптуу калдыктар менен иштөө жана интеллектуалдык менчик жаатындагы укук бузууларга каршы күрөшүү жаатындагы кызматташууга тиешелүү бир катар документтерди кабыл алуу пландалууда.

Түркмөнстанга болгон иш сапардын алкагында бир катар эки тараптуу жолугушуулар дагы мерчемделүүдө.