Ашхабад шаарында Чыңгыз Айтматовдун эстелиги орнотулду

Түркмөнстандын Ашхабад шаарындагы Махтумкули Фраги маданий-парк комплексинде Кыргыз эл жазуучусу Чыңгыз Айтматовдун эстелиги орнотулду. Бул тууралуу бүгүн, 24-майда Министрлер кабинетинен билдиришти.

Маалым болгондой, эстелик колодон жасалган, анын бийиктиги 3,5 метрге жетет, ал эми постаменти 2,5 метрге барабар.

Белгилей кетсек, 17-майда Түркмөнстандын эл акыны жана философу Махтумкули Фрагиге арналган эбегейсиз парк комплексинин ачылышы президент Сердар Бердымухамедовдун катышуусунда өткөн.

"Парк түзүү идеясы түркмөн элинин улуттук лидери Гурбангулы Бердымухамедге таандык. Парктын аймагында түркмөн акыны жана ойчулунун 60 метрлик эстелигинен тышкары чет элдик жазуучулардын 25ке жакын эстелиги орнотулган", - деп айтылат маалыматта.