Садыр Жапаров жакында Түндүк-Түштүк жолу ачыла тургандыгын айтты

Садыр Жапаров Түндүк-Түштүк жолу жакында ачыларын билдирди. Бул тууралуу президент кечээ, 25-майда Балыкчыдагы эт комбинатынын ачылышында билдирди.

Мамлекет башчы Балыкчыдагы эт комбинатынын ачылышында сөз сүйлөдү.

"Түндүк-Түштүк жолу жакында ачылат. Төрт сааттын ичинде түштүктөн Балыкчыга чейин барса болот. Балыкчы-Макмал багыты боюнча темир жол да курулууда. Кудай буюрса, Макмалга жетсек, түндүктөн түштүккө темир жол менен да каттап калабыз ", - деди мамлекет башчысы.

Белгилей кетсек, Түндүк-Түштүк альтернативалык жолу татаал тоо ландшафттарында курулуп жаткан 433 чакырымдык магистраль болуп саналат. Аталган жол Кыргызстандын түндүк бөлүгүн – Балыкчы шаары, ал эми түштүк бөлүгүн – Жалал-Абад шаары бириктирип турат.