Кыргызстанда мыйзамсыз жүргөн 30 миңдей чет өлкөлүк аныкталды

2023-жылдан бери өлкө аймагында мыйзамсыз жүргөн 29 миң 846 чет мамлекеттин жарандары аныкталып, аларга айып салынды. Бул тууралуу бүгүн, 27-майда ички иштер министринин орун басары Нурбек Абдиев парламенттин Социалдык саясат боюнча комитеттин жыйынында билдирди.

Анын айтымында, салынган айыптардын көлөмү 102 миллион 160 миңди түзгөн.

Ошондой эле Абдиев жыл башынан бери мыйзамсыз кирген чет өлкөлүктөр боюнча маалымат берди.

"2024-жылдагы төрт айда ички иштер органдары тарабынан мигранттарды мыйзамсыз алып келүү жана аны уюштуруу боюнча жалпы 90 кылмыш иши тергелген. Анын ичинен 81 кылмыш иши сотко жиберилген. 6 иш тергелүүдө. Ал эми Укук бузуулар кодексинин негизинде 2024-жылдын төрт айында чет өлкөлүктөр тарабынан 7 миң 259 бузуулар катталган. Айыптардын жалпы суммасы 39 миллион сомду түзөт", - деди ал.