Саламаттыкты сактоо министрлиги алдамчылык фактылары боюнча эскертти

Саламаттыкты сактоо уюмдарына байланыштуу алдамчылык фактылары көбөйдү. Бул жөнүндө Саламаттыкты сактоо министрлиги эскертип, жарандарды сак болууга чакырды.

Маалыматта белгисиз адамдар өздөрүн министрликтин кызматкерлерибиз деп тааныштырып, белгилүү бир номерлерге акча которууну суранышып жатканы белгиленет.

"Бардык маселелер боюнча аракеттерди жана формалдуулукту Саламаттыкты сактоо министрлигинин борбордук аппаратынын тиешелүү түзүмдүк бөлүмдөрүнүн жооптуу кызматкерлери ишке ашырышат", - деп билдиришти мекемеден.

Буга байланыштуу министрлик жарандарды жана медициналык мекемелердин кызматкерлерин сак болууга чакырды.

"Мындай фактылар тууралуу укук коргоо органдарына же Саламаттыкты сактоо министрлигинин Адам ресурстары жана укуктук колдоо бөлүмүнө 0312 62-18-40 номери аркылуу билдирүүнү өтүнөбүз", - деп жазылат маалыматта.