"WhatsApp'тагы жалган билдирүүлөргө ишенбеңиз". ИИМдин эскертүүсү  

ИИМ жарандарды WhatsApp мессенджери аркылуу келген жалган билдирүүлөргө ишенбөөгө чакырды.

Акыркы күндөрү WhatsApр’та адамдардын тобу өзүлөрүн милиция кызматкерлери катары тааныштырып, жарандардан жеке маалыматтарды чогултуп жатышканы, бирок алар уурулук менен алектенген адамдар экендиги тууралуу билдирүү таратылууда.

"Жалган маалыматка ишенбегиле. Эгерде сиздерге ушул сыяктуу текст менен СМС-билдирүү келсе, аны башка жакка жөнөтпөңүздөр.

Мындай фейк СМС-билдирүүлөр калк арасында араздашууну жаратууга кызыкдар адамдар тарабынан өздөрүнүн жеке максаттарына жетүү үчүн жасалып таркатылат", - деп билдиришти министрликтен.

Өлкө аймагында мындай көрүнүш менен жарандардын үйлөрүнө келип, өздөрүн милиция кызматкери катары тааныштырган фактылар катталган эмес.

Эскерте кетсек, участкалык милиция кызматкерлери зарыл болгон учурда гана аларга бекитилген аймактардагы үйлөрдү кыдырып маалымат алышат.

"Алар ар дайым кызматтык кийим кийип, кызматтык күбөлүктөрүн алып жүрүшөт. Көкүрөгүндө онлайн камералары, жашоочуларды, социалдык объектилерди, өзүнө тейлөөгө берилген аймакта объектилерди жана керектүү маалыматты камтууга электрондук каттоо үчүн планшеттери дагы бар болот.

Участкалык милициянын кызматкерлери үйүңүздөргө барганда, сиз кызматтык күбөлүгүн көрүп, аны менен таанышып чыгууну суранышыңыз керек", - дешти мекемеден.

ИИМ үйгө шектүү адамдар шектүү суроолор менен келсе, дароо жергиликтүү ички иштер органдарына же 102 кыска номуруна кайрылууну эскертти.