Алматыда музыкант Викрам Рузахуновдун иши боюнча мурдагы орун басар кармалды

Алматы шаардык ички иштер башкармалыгынын жетекчисинин мурдагы орун басары Берик Абильбеков кыргызстандык музыкант Викрам Рузахуновдун жана январь окуясында кыйноого алынган 22 жабырлануучунун иши боюнча шектүү катары кармалды. Бул туурасында казакстандык басылмалар Башкы прокуратуранын басма сөз кызматына шилтеме берүү менен жазып чыгышты.

Маалымдалгандай, Казакстандын башкы прокуратурасы 2022-жылдын январь айында Алматы облусунун Карасай районунун Кошмамбет айылында жайгашкан атайын тергөө абагында жарандарга карата кыйноолорду колдонуу фактысы боюнча кылмыш ишин териштирип жатат.

«Тергөө жүрүп жаткан кылмыш ишинин алкагында Алматы полициясынын башчысынын мурдагы орун басары Берик Абильбеков кармалды», - деп айтылган маалыматта.

Айта кетсек, 14-апрелде музыкант Рузахуновдун иши боюнча төрт полиция кызматкери шектүү катары кармалган.

Эске салсак, январь айында Казакстанда орун алган башаламандык учурунда коңшу өлкөдөгү телеканалдардын биринде тополоңго катышканы Кыргыз өлкөсүнөн учуп баргандыгын айткан видео көрсөтүлгөн. Андан соң интернет колдонуучулары видеодогу жаран жаз музыканты Викрам Рузахунов экендигин жазышкан.

Бул боюнча Тышкы иштер министрлиги жана ИИМ аталган жарандын кармалышы боюнча тиешелүү чаралар жүргүзүлүп жатканын билдиришкен. Президент Садыр Жапаров, УКМКнын төрагасы Камчыбек Ташиев Викрам Рузахуновдун кармалышы боюнча пикирлерин айтышкан.

10-январда музыкант өлкөгө алып келинген.