1-июндан баштап Кыргызстанда оор жүк ташуучу унааларга чектөө киргизилет

1-июндан тарта оор жүк ташыган унааларга убактылуу чектөө киргизилет. Бул тууралуу бүгүн, 29-майда Транспорт жана коммуникациялар министрлигинин маалымат кызматы билдирди.

Мындай чектөө салынган жолдордун сапатын сактоо, анын талкаланышына жол бербөө максатында 1-июндан 1-сентябрга чейин киргизилет.

"Абанын күндүзгү температурасы +28 градустан жогору болгон учурда эртең мененки саат 10:00дөн кечки саат 20:00гө чейин жүк ташыган унаалардын жалпы пайдалануудагы унаа жолдорунда жүрүүсүнө убактылуу чектөө киргизилет. Мында максималдуу жалпы салмагы 18 тоннадан ашкан оор жүк ташуучу унаалардын кыймылына тыюу салынат", - деп айтылат маалыматта.

Бирок бул чектөө айрым оор жүк ташыган унааларга колдонулбайт:

• Жүргүнчү ташыган;
• Гуманитардык жардам ташыган;
• Тез бузулуучу тамак-аш азыктарын жана кооптуу жүктөрдү ташыган;
• Берилген атайын уруксаттын негизинде ири көлөмдөгү жүктөрдү ташыган;
• Жол курууга жана оңдоого тартылган унааларга (берилген ордер боюнча).

Министрлик киргизилген чектөөнүн сакталышы көзөмөлгө алынып, текшерүү иштери үзгүлтүксүз жүргүзүлүп турарын кошумчалады.