Ататүрк паркы боюнча маселе: Мэрия депутат Бекешевдин "бир адам каза болду" деген сөзүнө жооп берди

Бишкек шаарынын мэриясы Жогорку Кеңештин депутаты Дастан Бекешевдин Ататүрк сейил багы боюнча маселеге байланыштуу "бир адам каза болду" деген сөзүнө жооп берди.

"Каза болгон жарандын себептери тууралуу расмий маалыматка компетенттүү органдар тарабынан түшүндүрмө берилет. Мындан улам мэрия депутат Дастан Бекешевди жана башка кызыкдар тараптарды коомчулукту адаштырбоону суранат.

Белгилей кетсек, Дастан Бекешев Жогорку Кеңештин жыйындарында бир нече жолу Ататүрк паркынын чек арасын бекитүү чечимин демилгелеген. Депутат юрист катары бул чечимдин кесепети кандай болорун жакшы түшүнгөн", - деп айтылат маалыматта.

Ошондой эле мэрия Ататүрк сейил багынын аймагын кайтаруу боюнча иштерди мыйзамдын алкагында алып барарын кошумчалады.

Белгилей кетсек, бүгүн, 29-майдагы парламенттин жыйынында Бекешев Ататүрк паркынын аймагындагы үйдө жашаган бир адам каза болгонун айтып, мэрия жарандарга кысым көрсөтүүнү улантып жатат деген.