Жапаров Кара-Сууда бүтүрүүчүлөргө кайрылды

Министрлер кабинетинин төрагасы Акылбек Жапаров Кара-Суу районунун Кара-Дөбө айылындагы 275 орундуу мектептин ачылышына катышты.

Анда Жапаров республика боюнча курулушу башталып, бирок ортодо токтоп калган мектептердин 80 пайызы бүткөрүлгөнүн айтты. Бул тууралуу өкмөттөн бүгүн, 30-майда маалымдашты.

"Бул мектептин курулушу 9 жыл мурда башталган эле. Эми мына курулуш иштери аяктап, биздин балдар, биздин кыздар жаңы окуу жайына кирип жатышат", - деди Жапаров.

Буга удаа минкаб башчысы билим берүү тармагына өзгөчө көңүл бурулуп, акыркы үч жылда 214 жаңы мектеп салынганын белгиледи.

"Элдин кирешесин көбөйтүү үчүн 365 миңден ашык адамдын айлык акысын жогорулаттык, анын ичинде мугалимдердин, дарыгерлердин, мамлекеттик жана муниципалдык жана башка тармактын кызматкерлердин маянасы жогорулады. Булардан тышкары 700 миңден ашык пенсионердин пенсиясына 3 жылда 3000 сомдон ашык коштук", - деди ал.

Ошондой эле Жапаров бүтүрүүчүлөргө жана алардын ата-энелерин кайрылып, кесип жана жогорку окуу жайды тандоодо дыкат мамиле кылууга чакырды.