Түркиядагы көчмөндөр оюну боюнча мамлекеттик кызматкерлер кармалды

Өзгөчө ири суммадага акча каражаттарды мыйзамсыз ыйгарып алган деген шек менен Маданият, маалымат жана жаштар саясаты министрлигине караштуу Дене тарбия жана спорт департаментинин жооптуу кызмат адамдары кармалды. Бул тууралуу УКМК кабарлады.

УКМК Спорттун улуттук түрлөрү боюнча дирекциянын директору Э.У.Т. аталган дирекциянын башкы эсепчиси К.Р.К. жана Дене тарбия жана спорт департаментинин каржы бөлүмүнүн башчысы А.Р.Д. аттуу жарандарды кармаган.

"Аталган жооптуу кызмат адамдары, Спорттун улуттук түрлөрү боюнча дирекция тарабынан «Көк бөрү», «Кыргыз күрөш», «Алыш бел боо күрөш», «Салбуурун», «Кулатуу», «Ат оюндары» федерацияларын көзөмөлдөгөн усулчу жана машыктыруучулар менен алдын ала макулдашып алып, 2022-жылы Түркияда өткөн 4-Дүйнөлүк көчмөндөр оюндарына барып келген спортчуларга күнүмдүк тамак ашына, байге фондуна жана окуу-машыгуу жыйындарын өткөрүү үчүн мамлекеттин эсебинен бөлүнгөн өзгөчө ири суммадагы акча каражаттарын өздөрүнө мыйзамсыз ыйгарып алышканы такталды", - деп билдиришти УКМКдан.

Азыркы учурда бул коррупциялык схемага тиешеси бар жооптуу кызмат адамдарын аныктоо максатында тиешелүү ыкчам тергөө амалдары жүргүзүлүүдө.