Ноокенде 20 жылдыктар айылдагы жалгыз бой энеге 2 миллион сомго үй салып беришти

Ноокен районунун Дооронбек Садырбаев айыл өкмөтүнүн Бирдик айылынын №31 Жумалы Татыкулов орто мектебинин 1986-1987-жылкы мектеп бүтүрүүчүлөрү айылдагы жалгыз бой энеге үй салып беришти. Бул тууралуу бүгүн, 4-июнда Муфтияттан билдиришти.

Маалымдалгандай, бүтүрүүчүлөр өз айылынын көйгөйлүү маселелерин чечүүдө ар дайым көмөктөшүп келишет. Бул мезгилге чейин да бир топ алгылыктуу иштерге жардам колун сунушкан. Салтка айланган 10 жана 20 жылдык мааракелерди уюштурушкан мектеп бүтүрүүчүлөрү бир күндүк жыргалчылыктын ордуна сооп иштерди жасап, айылдаштарынын алкоосуна татып келишет.

Ага ылайык, жалгыз бой энеге жана анын балдарына арналып салынган үйгө жалпысынан 2 миллион сомдон ашуун акча каражат жумшалган. Келерки жылкы мектеп бүтүрүүчүлөрү ушул эле үйдүн тегерегин тосуп, дарбаза коюп берерин убадалашты.

"Ал эми үйлүү болуп кубанып турган эне уюштуруучуларга жана демилгечилерге ыраазычылыгын билдирди. Сооптуу иштин башында турган 1987-жылкы балдардын мындай аракети айыл элин кубантты", - деп айтылат маалыматта.