Жогорку Сот Бактыбек Чойбековдун мандаты боюнча чечим чыгарды

Жогорку Сот Бишкек шаардык сотунун депутат Бактыбек Чойбеков Талас округундагы шайлоодо добуш сатып алган деген чечимин жокко чыгарды. Мындай чечим 5-июнда кабыл алынганын Жогорку Соттун басма сөз кызматы ырастады.

"Жогорку Соттун 2024-жылдын 5-июнундагы токтому менен Бишкек шаарынын администрациялык сотунун 2024-жылдын 28-февралындагы аныктамасы жана Бишкек шаардык сотунун 2024-жылдын 9-апрелиндеги аныктамасы жокко чыгарылды", - деп айтылат маалыматта.

Буга чейин, 15-майда Борбордук шайлоо комиссиясы №21 Талас шайлоо округундагы шайлоонун жыйынтыгын жокко чыгаруу боюнча Бишкектин административдик соту жана Бишкек шаардык соту чыгарган чечимдерге каршы Жогорку Сотко арызданган.

2021-жылы өткөн парламенттик шайлоодо бир мандаттуу №21 Талас шайлоо округунан талапкер болгон Эмилбек Абдыкадыров быйыл аталган округдан депутат болуп келген Бактыбек Чойбеков добуш сатып алганын айтып, шайлоонун жыйынтыгын жокко чыгаруу боюнча БШКга кайрылган. Боршайком 22-февралдагы отурумунда анын арызын негизсиз деп четке каккан.

Андан соң Абдыкадыров БШКнын чечимине каршы сотко кайрылган. Бишкектин административдик соту 28-февралда анын арызын канааттандырган. Бул чечимди Бишкек шаардык соту 9-апрелде күчүндө калтырган.