Өлкөгө тооктун жумурткасын алып кирүүгө тыюу салынды

Өлкө өз аймагына тооктун жумурткасын алып кирүүгө тыюу салды. Бул тууралуу Токтом маалыматтык-укуктук порталында айтылды.

Маалым болгондой, мындай чечим өлкөнүн азык-түлүк коопсуздугун камсыз кылуу, азык-түлүк товарларына рыноктук бааны турукташтыруу жана ички рыноктун талаптагыдай иштешин камсыз кылуу үчүн кабыл алынган.

Тийиштүү токтом 5-июнда Министрлер кабинети тарабынан кабылданган жана ал расмий жарыялангандан үч күндөн кийин күчүнө кирет. Чектөө 6 айлык мөөнөткө киргизилүүдө.

Буга чейин Суу ресурстары, айыл чарба жана кайра иштетүү өнөр жайы министрлиги жумуртка импортуна убактылуу тыюу салууну сунуштап, тиешелүү токтом долбоорун коомдук талкууга койгон болчу. Анда министрлик мындай чечим жергиликтүү ишкерлердин кайрылуусунан улам кабыл алынып жатканын жүйө келтирген.