Социалдык өнүктүрүү министрлиги: 2011-2012-жылдар аралыгында кыш айларында 64 үй-жайсыз адам каза болгон

2011-2012-жылдар аралыгындагы кыш айларында 64 үй-жайсыз адам каза болгонун Социалдык өнүктүрүү министрлигинин басма сөз кызматы билдирди. “Үй-жайсыз адамдар коомчулукта, өзгөчө кыш айларында чоң социалдык маселелердин бири болуп келет. Практика көрсөткөндөй, алар жашоонун кыйын абалдары менен күрөшө алышпайт. Андыктан Социалдык өнүктүрүү министрлиги “2012-2014-жылдарга карата КРнын элинин социалдык коргоосун өнүктүрүү стратегиясынын” негизинде үй-жайсыз адамдарга карата тиешелүү иш-чараларды көрө баштады”,- деп жазылат аталган министрликтин билдирүүсүндө. Ошондой эле Социалдык өнүктүрүү министрлигинин басма сөз кызматы учурда республика боюнча үй-жайсыз адамдар үчүн  9 турак жай ачык экенин белгилешти. Кыш айларында Бишкек шаарында жана Чүй облусундагы үйлөрдүн бардыгы толуп калганына байланыштуу министрлик үй-жайсыз калган адамдарга Нижний-Серафимовский интернат-үйүндө 4 айлык мөөнөткө орун бөлүнүп берилди.