Жалал-Абадда диний окуу борборлорунун ишмердүүлүгү текшерилип, бир окуу борборго айып пул салынды

Кечээ, 11-июнда Жалал-Абад шаарында жайгашкан диний окуу борборлорго рейд жүргүзүлдү. Бул тууралуу Жалал-Абад мэриясынан билдиришти.

Маалым болгондой, анда Жалал-Абад шаардык мэриядан жана тиешелүү кызматтардын өкүлдөрүнөн турган комиссия курамы тартылып, санитардык абалы, коопсуздук жагдайлары боюнча түшүндүрүү иштери жүргүзүлдү.

Ага ылайык, Дин иштери боюнча мамлекеттик комиссиянын каттосунан өтпөгөн, нормадан ашыкча көп сандагы балдарды бир бөлмөдө окутуп жаткан 1 диний окуу борбору аныкталып, жеринде Укук бузуулар кодексинин 142-беренесинин 4-бөлүгүнө ылайык, 7,5 миң сом өлчөмүндө айып пул салынып, борбор убактылуу жабылды.

Мындан тышкары мечиттерге, диний окуу борборлорго коюлган талаптардын аткарылышы көзөмөлгө алынып, айтылган кемчиликтерди жоюу боюнча окуу борборду уюштурган жеке тараптарга эскертүүлөр берилди.

Белгилей кетсек, Жалал-Абад шаарында 42 мечит, 4 медресе, 1 диний окуу борбору бар.