Бишкек мэриясынын түзүмүндө жаңы муниципалдык мекеме ачылды

Бишкек шаарынын жергиликтүү өз алдынча башкаруу органдарынын бирдиктүү саясатын жүргүзүү үчүн борбордун мэриясынын түзүмүндө Отун-энергетикалык комплекс департаменти түзүлдү. Бул тууралуу бүгүн, 13-июнда Бишкек мэриясынан билдиришти.

Маалымдалгандай, департамент Министрлер кабинетинин 7-июндагы №303 токтомунун негизинде түзүлгөн. Ага ылайык, Бишкек шаарынын мэриясына муниципалитеттин түзүмүнө шаардын отун-энергетикалык комплексинин ишин уюштуруучу мекеме болгон ишкананы түзүү тапшырылган.

"Министрлер кабинетинин бул токтому менен "Электр станциялары" ААКсынын Бишкек шаарынын ЖЭБ жана "Бишкекжылуулук" ААКсы филиалдарынын мүлк комплекстери Бишкек шаарынын мэриясынын карамагына өткөрүлдү", - деп айтылат маалыматта.

Белгилей кетсек, Бишкек мэриясынын Отун-энергетика комплекси департаментине жылуулук, газ жана электр менен жабдуу тармактарын эксплуатациялоо жана өнүктүрүү боюнча иш-чараларды координациялоо жана контролдоо боюнча ыйгарым укуктар берилди.