Кытай БУУнун трибунасынан Украина менен Орусияга кайрылды

Кытайдын БУУдагы туруктуу өкүлүнүн орун басары Гэн Шуанг Украина менен Орусияны тынчтык сүйлөшүүлөрүн мүмкүн болушунча тезирээк баштоого чакырды. Бул тууралуу чет элдик басылмалар жазышты.

"Куралдар согушту токтото алат, бирок алар туруктуу тынчтыкка алып келбейт. Кытай чыр-чатактын катышуучуларын саясий эркти көрсөтүп, бири-бири менен жолугуп, ок атышпоого жетишүү жана согушту токтотуу үчүн мүмкүн болушунча тезирээк тынчтык сүйлөшүүлөрүн баштоого чакырат", - деген ал БУУнун Коопсуздук кеңешинин жыйынында.

Кытай дипломаты ошондой эле эл аралык коомчулукту тынчтыкка жана адамзатка артыкчылык берүүгө, карама-каршылыктын күчөшүнө жол бербөөгө, кризистин терс кесепеттерин жоюу үчүн күчтөрдү бириктирүүгө жана саясий кырдаал үчүн шарттарды түзүү үчүн биргелешип иштөөгө чакырды.

Кытай өкүлү ошондой эле АКШны кытай тарап согушту колдоду деген жалган жалааларды таратып жатат деп айыптады.

"Кытай ар дайым тынчтыкка жана саясий чечимди алдыга жылдыруу үчүн сүйлөшүүлөрдү илгерилетүүгө чакырып келет", - деди ал.