Дагы бир президент Украина боюнча тынчтык саммитине сапарын токтотту

Колумбиянын президенти Густаво Петро Швейцарияда өтө турган Украина боюнча дүйнөлүк тынчтык саммитине сапарын токтотту. Бул тууралуу мамлекет башчысы Колумбиянын Blu радиосуна билдирген.

Петро мындай чечимин бул саммитти Украина менен Орусиянын ортосунда тынчтыкка алып келе турган саммит деп эсептебей тургандыгы менен түшүндүргөн.

"Мен визитимди токтотууну чечтим, анткени Латын Америкасы жаңы согуштарды каалабайт, ал мүмкүн болушунча тезирээк тынчтык орнотууну жана Украина менен Орусиянын ортосундагы согушту токтотуунун жолдорун издейт", - деген Колумбиянын президенти.

Ал ошондой эле Европаны жаңжалды улантуунун ордуна, аны токтотууну талкуулоого чакырды. Колумбиянын лидеринин айтымында, иш-чарадагы тыянактар ​​алдын ала эле пландалган.

15-16-июнда Швейцарияда Украинадагы жаңжалды жөнгө салуу боюнча саммит өтүүдө. Саммитке Орусия чакырылбай, Кытай катышуудан баш тартты. Швейцариядагы саммитке Чоң жыйырмалыкка мүчө өлкөлөр Мексика менен Сауд Арабиясынын делегациялары катышпайт.