"Бишкек ЖЭБдин карызын ким төлөйт?" Энергетика министринин жообу

Бүгүн, 19-июндагы Жогорку Кеңештин жыйынында депутат Дастан Бекешев мэриянын карамагына өткөн Бишкек ЖЭБдин карызын ким төлөй турганына кызыкты.

Жыйында "Жергиликтүү мамлекеттик администрация жана жергиликтүү өз алдынча башкаруу органдары жөнүндө мыйзамга өзгөртүүлөрдү киргизүү тууралуу" мыйзам долбоору каралып жаткан.

"Бишкектеги ЖЭБ 386 миллион доллар насыя алган. Эми ошол насыяны ким төлөйт? Мэрия төлөйбү, же Финансы министрлигиби?" - деди ал.

Энергетика министри Талаайбек Ибраев карызды мэрия эмес, өкмөт төлөй турганын айтты.

"Мамлекет "Бишкек жылуулук энерго" ишканасынын, ЖЭБдин моюнундагы карыздарын мэрияга илбестен, өзүнө алып, тазалап берет", - деди Ибраев.

Эске салсак, 29-майда Бишкектеги бир катар объекттер, анын ичинде Бишкек Жылуулук электр борбору (ЖЭБ) мэриянын карамагына өткөрүлүп берилгени маалым болгон.