Армения Палестинаны мамлекет катары тааныды

Армения Палестинаны мамлекет катары тааныйт. Бул тууралуу бүгүн, 21-июнда аталган өлкөнүн Тышкы иштер министрлиги билдирди.

Министрликтин сайтына жарыяланган маалыматта Газа секторундагы абал эл аралык саясий күн тартибинде чечүүнү талап кылган башкы маселеге айланганы, андыктан расмий Ераван Израил менен Палестинанын ортосунда тынчтык орношуна кызыкдар болуп жатканы белгиленген.

"Армения жарандык инфраструктурага кол салууну, элге карата жасалган зордук-зомбулукту, адамдарды барымтага алууну кескин айыптап, эл аралык коомчулуктун барымтадагыларды эч кандай шартсыз бошотуу талабына кошулат. Армения БУУнун Башкы Ассамблеясынын Газа секторундагы ок атууну токтотууга чакырган резолюцияларына кошулган. Армения Жакынкы Чыгышта туруктуулуктун орношуна, еврей жана палестин элинин ортосунда тынчтык өкүм сүрүүсүнө чындап кызыкдар", - деп айтылат маалыматта.

Ошондой эле Ераван Израил-Палестина жаңжалын "эки мамлекет" принцибинин негизинде чечүүнү колдоорун билдирген.

"Армения элдердин эгемендүүлүктө жана тынчтыкта ​​жанаша жашоо принциптерине берилгендигин ырастайт жана Палестина мамлекетин тааныйт", - деп айтылат билдирүүнүн жыйынтыктоочу бөлүгүндө.