Казакстанда менчик бала бакчадагы балдар жапырт ууланган учур катталды

Казакстанда жеке менчик бала бакчада жапырт уулануу болду. Бул тууралуу казак басылмалары жазууда.

Маалыматтарга караганда, Түркистан облусунун Келес районундагы бала бакчанын кызматкерлери балдардын абалы начарлап баштаганда дарыгер чакыртышкан. Натыйжада, 2 жаштан 5 жашка чейинки 34 бала оруканага жеткирилген. Алгачкы медициналык жардам көрсөтүлгөндөн кийин балдардын көбү үйүнө чыгарылып, абалы оорураак делген үч наристе калтырылган.

Облустук Санитардык-эпидемиологиялык көзөмөл департаменти учурда уулануунун так себептерин иликтөө иштери жүрүп жатканын билдирген. Жапырт уулануу балдарга берилген тамак-аштан улам болушу мүмкүн экени болжолдонууда.

Ал эми облустук полиция бул боюнча Кылмыш-жаза кодексинин "Санитардык эрежелердин жана гигиеналык нормалардын бузулушу" деген берене менен кылмыш иши козголгонун кабарлады.