Венгриянын Кыргызстандагы элчиси «Достук» ордени менен сыйланды

Бүгүн, 27-июнда президент Садыр Жапаров Венгриянын Кыргызстандагы элчиси Шандор Дорогини кабыл алды. Бул тууралуу өлкө башчынын маалымат кызматы кабарлады.

Жолугушууда кыргыз-венгер мамилелерин эки тараптуу өнүктүрүүнүн актуалдуу маселелери талкууланды.

Анда Кыргызстан менен Венгриянын ортосундагы стратегиялык өнөктөштүктү мындан ары да бекемдөөгө, гуманитардык, билим берүү демилгелери чөйрөсүндө кызматташууну тереңдетүүгө басым жасалды.

Мындан тышкары мамлекет башчысы 2023-жылдын февраль айында стратегиялык өнөктөштүктү бекемдөө жана өнүктүрүү боюнча Биргелешкен декларацияга кол коюу эки тараптуу мамилелерди өнүктүрүүдөгү маанилүү этап болоорун белгиледи.

Садыр Жапаров элчи Шандор Дорогиге кыргыз-венгер мамилелеринин өнүгүшүнө кошкон жеке салымы жана эки өлкөнүн ортосундагы достукту чыңдоодо көрсөткөн жогорку кесипкөйлүгү үчүн ыраазычылык билдирип, «Достук» орденин тапшырды.

Өз кезегинде элчи Шандор Дороги мамлекет башчыга кыргыз-венгер кызматташтыгынын үч негизги багыты – экономикалык, билим берүү жана маданий байланыштар боюнча аткарылып жаткан иштер тууралуу кеңири айтып берди.