Жогорку Кеңештин мурдагы депутаты, ишкер Роман Шин каза болду

Кечээ, 27-июнда саясатчы жана ишкер Роман Шин каза болду. Бул тууралуу анын баласы Сергей Шин социалдык тармактардагы баракчасы аркылуу билдирди.

Ал терең кайгыруу менен атасынын каза болгондугун айтты.

"Кымбаттуу достор, атам Роман Александрович Шин бул дүйнөдөн өттү. Атам биз үчүн, туугандары үчүн жана достору үчүн ак кызматын кылган. Атам ар дайым биздин жүрөгүбүздө жана эсибизде сакталып калат", - деп жазган ал өзүнүн социалдык баракчасына.

Роман Шин 1948-жылы туулган. Физикалык жабдууларды чыгаруучу заводдо иштеп, кийинчерээк ишкерлик менен алектене баштаган.

2005-2012-жылдары ар кайсы саясий партиялардан Жогорку Кеңештин депутаты болгон.

Айрым маалымат каражаттары боюнча Шин Кыргызстандагы эң бай адамдардын катарына кирген.

SUPER.KG порталынын жааматы Роман Шиндин үй-бүлөсүнө жана жакындарына терең кайгыруу менен көңүл айтат.