Кол чатырды унутпаңыз! Өлкөдө 2-июлга чейин туруксуз аба ырайы күтүлөт

Өлкө аймагында 29-июндан 2-июлга чейин туруксуз аба ырайы күтүлөт. Күтүлүп жаткан нөшөрлүү жаан-чачынга байланыштуу, тоолуу жана тоо этектериндеги райондордо сел жүрүшү жана дарыяларда суунун деңгээли көтөрүлүшү мүмкүн. Бул тууралуу бүгүн, 28-июнда Өзгөчө кырдаалдар министрлиги кабарлады.

Ага ылайык, ӨКМ селди алдын алуу максатында бир катар эрежелер менен бөлүштү:

- арыктарды тазалап, жээгин бекемдеңиз жана таштанды таштабаңыз;
- турак үй жайгашкан жерде жаан суулары агып өтүүгө ылайыкталган арыктын болушун камсыздаңыз;
- үй же сарай салууда, эгин айдоодо сел жүрүү кооптуулугу бар тилкелерге жакын эместигине өзгөчө көңүл буруңуз;
- сел учурунда дароо коопсуз жайга кетиңиз;
- мүмкүнчүлүк болсо үйдөгү свет, суу, газды өчүрүп чыгыңыз.