Бишкектин борборунда митинг өткөрүүгө салынган тыюу узартылды

Бишкектин борборунда митинг өткөрүүгө салынган тыюу 30-сентябрга чейин узартылды. Бул тууралуу маалыматты бүгүн, 3-июлда Бишкек шаарынын Биринчи май райондук сотунан ырастады.

Маалыматка ылайык, райондук сот Бишкектин Биринчи май администрациясынын тынч чогулуштарды өткөрүүнү чектөө тууралуу арызын 28-июнда карап, канааттандырган.

Митингге чыгууга болбой турган жайлар:

• "Ала-Тоо" аянтында;
• Эркиндик кең көчөсү: Темир жолдон Чүй кең көчөсүнө чейин;
• Президенттик администрациянын жана Жогорку Кеңештин имаратынын жанында;
• Панфилов паркында;
• Таттыбүбү Турсунбаева атындагы скверде;
• Жогорку соттун алдында;
• Орусиянын Кыргызстандагы элчилигинин алдында;
• УКМК жана ИИМ имараттарынын жанында.

Райондук сот ар кандай акцияларды Горький паркында өткөрүүгө уруксат берилгенин кошумчалады.

Эске салсак, сот буга чейин акимияттын ушундай өтүнүчүн 29-мартта карап, чектөөнү 1-апрелден 30-июнга чейин узарткан болчу.