Жогорку соттун төрагасы кармалган судьялар боюнча оюн айтты

Бүгүн, 4-июлда Жогорку соттун төрагасы Замирбек Базарбеков жергиликтүү соттор менен онлайн кеңешме өткөргөнүн мекеменин басма сөз кызматы кабарлады.

Маалыматка ылайык, кеңешмеде Чүй облустук сотунун судьяларынын кармалышы талкууланган. Анда Базарбеков сот системасынан коррупцияга аралашкандарды тазалоо иштерин колдой турганын айткан.

"Сот системасында "жеке кызыкчылыгы бар судьяларга орун жок" деп бир нече жолу эскерткем. Тилекке каршы, айрымдары жыйынтык чыгарбагандыгы көрүнүп турат. Мен дагы бир жолу эскертип коёюн, укук коргоо органдарынын мындай көрүнүштөрдү жоюу жана коррупцияга аралашкан судьяларды кармоо иштерине Жогорку соттун төрагасы катары колдоо көрсөтөм", - деген ал.

Ошондой эле Базарбеков соттор арасында пара менен кармалгандарга катуу чаралар көрүлө тургандыгын белгилеген.

Эске салсак, кечээ Чүй облустук сотунун 2 судьясы УКМК таранынан кармалганы кабарланган. Андан соң Соттор кеңеши чукул жыйынга чогулуп, аларды кылмыш жоопкерчилигине тартууга макулдук беришкен.