Эртеңден тарта Бишкекте эки гана троллейбус каттамы жүрөт

Бишкек шаарында жолдорду капиталдык оңдоо иштери уланууда. Бул тууралуу бүгүн, 6-июлда Бишкек мэриясынан билдиришти.

Маалыматка ылайык, эртең, 7-июлда Абдрахманов көчөсү менен Чүй проспектисинин ортосундагы тилкеде оңдоо иштери башталат. Буга байланыштуу № 2, № 4 жана № 7 троллейбус каттамдарынын кыймылы убактылуу токтотулат.

Ал эми шаарда №11 жана №14 гана троллейбус каттамы жүрөт.

"Шаар тургундарынан жана конокторунан убактылуу ыңгайсыздыктар үчүн кечирим сурайбыз. Ага байланыштуу сапарларыныздарды пландаштыруунун алдында ушул өзгөртүүлөрдү эске алууну суранабыз", - деп билдиришти мекемеден.

Белгилей кетсек, эртең, 7-июлда жолду оңдоо иштерине байланыштуу Жибек-Жолу проспектисинин Абдрахманов көчөсүнөн Ибраимов көчөсүнө чейинки бөлүгү жабылары белгилүү болду.