Москвадан кароосуз калган төрт ымыркай Кыргызстанга алып келинди

Эмгек, социалдык камсыздоо жана миграция министрлиги Москвадан ата-энесинин камкордугусуз калган 2 айдан 10 айга чейинки төрт ымыркайды мекенине алып келди. Бул тууралуу бүгүн, 7-июлда аталган министрликтен билдиришти.

Маалыматка ылайык, балдардын кайтарылышы Кыргызстандын Орусиядагы элчилигинин консулдук бөлүмү жана Саламаттык сактоо министрлигинин жардамы менен уюштурулду.

"Министрлик балдарды биологиялык үй-бүлөлөрү менен бириктирүү жана баланын абалын, анын ичинде социалдык, медициналык, психологиялык жана укуктук колдоо маселелерин комплекстүү баалоо боюнча иштерди жүргүзөт", - деп айтылат маалыматта.