"Үчөө милиция кызматкери..." Баңгизат менен алектенген топтун 13 мүчөсү кармалды

Чет өлкөлөрдөн Кыргызстанга баңги каражаттарын алып келе турган туруктуу канал түзгөн жана синтетикалык баңгизаттарды өндүрүүчү лаборатория уюштурган топтун мүчөлөрү кармалды. Бул тууралуу бүгүн, 9-июлда Ички иштер министрлигинен билдирди.

Маалыматка ылайык, аталган топтун жетекчилери мүчөлөрүн атайын окуудан өткөрүп, "кампачыларды", "дүң сатуучуларды", "фасовщиктерди" жана "күрөөканаларды" даярдашкан. Алар бири-бирин билишкен эмес жана берилген тапшырмаларды так аткарышкан.

"Бул топко тиешеси бар делип 18 жаштан 35 жашка чейинки 13 жаран кармалса, алардын үчөө милиция кызматкери болуп чыкты", - деп айтылат маалыматта.

ИИМ мыйзамсыз жүгүртүүдөн жалпы салмагы 12 килограммды түзгөн 60 миллион сомдук синтетикалык баңгизаттар алынганын кошумчалады.