Баткенде селдин кесепетинен Достук-Ак-Сай унаа жолундагы көпүрө бузулуп, жол жабылды

Тажикстан менен чектеш Көк-Терек айылындагы Достук-Ак-Сай унаа жолунда көпүрө бузулуп, каттам убактылуу токтотулду. Бул тууралуу бүгүн, 11-июлда Транспорт министрлигинен билдиришти.

Учурда аны биргеликте кайрадан калыбына келтирүү боюнча сүйлөшүүлөр жүрүп жатат.

Белгилей кетсек, кечээ, 10-июлда 16:00 чамасында Баткен облусунда нөшөрлөп жааган жамгырдан улам Айгүл-Таш-Согмент-Таян, Сох-Кан-Зардалы, Коргон-Катран-Баул жана Ош-Баткен-Раззаков унаа жолунун 313-330-чакырымдар аралыгы менен Баткен-Боз-Адыр тилкесинде каттам убактылуу жабылган.

Ага ылайык, "Кыргызавтожол-Түштүк” мамлекеттик ишканасы тарабынан тазалоо иштери жүргүзүлүп, Баткен-Боз-Адыр жолу эки тараптуу ачылып, калган унаа жолдордо бир тараптуу каттам берилген. Азыркы тапта селдин кесепеттерин жоюу, кеңейтүү иштери жүрүүдө.