УКМК Чүйдөгү Достук айыл өкмөтүнүн башчысын кармады

Аламүдүн районунун Достук (мурдагы Ленин) айыл өкмөтүнүн башчысы А.Э. кармалды. Бул тууралуу бүгүн, 11-июлда УКМКдан кабарлады.

Маалыматка ылайык, атайын кызмат тарабынан 10-июлда Кылмыш-жаза кодексинин 337-беренесинин 3-бөлүгү жана 210-беренесинин 2-пунктунун 4-бөлүгүндө каралган кылмыштардын белгилери боюнча козголгон кылмыш ишинин алкагында, кызматтык абалынан кыянаттык менен пайдалануу жана ишенип берилген мүлктү ыйгарып алуу же коротуу фактылары боюнча Аламүдүн районунун Достук айыл өкмөтүнүн башчысы А.Э. кармалды.

Тактап айтканда, 2017-жылдан 2022-жылга чейин А.Э. Аламүдүн районунун Төмөнкү Ала-Арча айыл аймагынын башчысы болуп туруп, айрым ишкердик субъекттерине (конкурстук тооруктардын милдеттүү жол-жоболорун сактабастан) ижарага жерлерди мыйзамсыз берүү жолу менен (ижара акысын жасалма төмөндөтүү жана жерлерди тиешелүү рыноктук баалоосуз) мамлекеттин бюджетине өзгөчө ири өлчөмдө зыян келтирген.

Ыкчам-иликтөө иш-чараларынын натыйжасында 2017-2022-жылдар аралыгында Төмөнкү Ала-Арча айыл өкмөтүнүн мурдагы башчысы А.Э. тарабынан мамлекетке 76 миллион 540 миң сом өлчөмүндө зыян келтирилген.

Ал УКМКнын убактылуу кармоочу жайына киргизилди. Окуяга тиешеси бар башка адамдарды аныктоого багытталган ыкчам-иликтөө иш-чаралары уланууда.