Оштун сел жүргөн аймактарында 5 миңден ашык абонентке жарык берилди

Ош облусунда 5100 абонентке жарык берилди. Бул тууралуу бүгүн, 15-июлда Энергетика министрлигинен билдиришти.

Маалыматка ылайык, 14-июлда Ош облусунун жана Ош шаарынын аймагында жүргөн катуу селдин кесепетинен “КУЭТ” ААКсынын филиалы - Ош электр тармактары ишканасынын Кара-Суу РЭТи тейлеген 7500 керектөөчүсү жарыксыз калган. Бул аймактан 8 даана электр тирөөчтү сел агызып кеткени айтылат.

"Кара-Суу районунда жайгашкан 110/10 кВ Беш-Мойнок көмөк чордонуна сел киргендиктен, Фуркат, Подсобный, Ачы, Коровник фидерлери чыңалуусуз калган.

Чыңалуусуз калган фидерлерге Ош-6 көмөк чордонунан чыңалуу берилип, натыйжада 5100 абонентке жарык берилди. Калган 2400 абонентке электр энергиясын берүү аракеттери көрүлүүдө", - деп жазылат анда.

Тиешелүү кызматтарга электр жабдыктарын тезинен калыбына келтирүү боюнча тапшырма берилген.

"Жалпы 26 персоналдан турган авариялык оңдоп-түзөө бригадалары иштеп жатат. 6 даана атайын техника: 4 даана бригадалык автоунаа, 1 даана экскаватор жана 1 даана камаз жумушка тартылды. Мындан тышкары Ош ЭТИнин кызматкерлери көмөк чордондогу селдин калдыктарын, таштандыларды тазалоо иштерин жеринде жүргүзүшүүдө", - деп жазылат маалыматта.