Ысык-Көлдөгү жол кырсык: Каза болгондор Аида Касымалиеванын ата-энеси экени айтылды

Ысык-Көл районунун Өрнөк айылындагы жол кырсыгынан каза болгондор Кыргызстандын БУУдагы туруктуу өкүлү Аида Касымалиеванын ата-энеси жана алардын 9 жаштагы небереси экени айтылды. Бул тууралуу бүгүн, 18-июлда айрым ЖМКлар жазып чыгышты.

Маалыматка ылайык, аларды акыркы сапарга узатуу зыйнаты 19-июль күнү саат 11де Ош шаарында болот.

Белгилей кетсек, жол кырсыгы 17-июлда болгон.

Облустук милициядан билдиргендей, чыгыштан батышты көздөй баратып кайрылып жаткан Toyota Avensis унаасы менен артынан келе жаткан Mercedes-Benz W210 унаасы сүзүшкөн. Toyota Avensis унаасынын айдоочусу, анын жубайы жана 9 жаштагы небереси каза болгон. Ал эми экинчи унаанын айдоочусу жана 2 жүргүнчү денелеринен жаракат алып, ооруканага жеткирилген. Унааны 20 жаштагы бишкектик жигит башкарып бара жаткан.

SUPER.KG порталынын жааматы Аида Касымалиевага жана анын жакындарына терең кайгыруу менен көңүл айтат.