Садыр Жапаров жубайы Айгүл Жапарова менен Хивадагы тарыхый жерлерге барды (сүрөт)

Бүгүн, 19-июлда өлкө башчы Садыр Жапаров Өзбекстандын президенти Шавкат Мирзиёевдин коштоосунда Хива шаарындагы Ичан-кала мамлекеттик тарыхый-архитектуралык музей-коругуна жана Нуриллабой сарайына барды.

Президенттин басма сөз кызматынан билдиргендей, эки өлкөнүн лидерлери жубайлары менен “ачык асман алдындагы музей” деп аталган Ичан-кала комплексине барышты.

Ичан-кала - Борбор Азияда сакталып калган жалгыз эстелик-шаар. Анда 120дан ашык архитектуралык эстеликтер орун алган.

1990-жылы Хива шаары ЮНЕСКОнун Дүйнөлүк мурастар тизмесине киргизилип, 1997-жылы 2500 жылдыгын белгилеген. 2020-жылы шаар Түрк дүйнөсүнүн маданий борбору, 2024-жылы ислам дүйнөсүнүн туристтик борбору деп жарыяланган.

Нуриллабой сарайы музейи XX кылымдын башында курулган. Комплекске медресе, галереялар менен байланышкан 100дөн ашык бөлмө кирет.