Бостеридеги пляждардын биринде куш байкалып, милиция чакырылды

Бостери айылындагы пляждардын биринде жарадар болгон Баклан аттуу куш куткарылып, "Бугу-Эне" зоопаркына реабилитацияга өткөрүлүп берилди. Бул тууралуу Ысык-Көл облустук ички иштер башкармалыгы кабарлады.

Маалыматка ылайык, милиция кызматкерлери Бостери айылында жайгашкан эс алуу борборлорунун бириндеги адамдардан пляждын жээгинен чоң баклан деп аталган жараланган канаттуу табылганы тууралуу кабар алышкан. Милиция кызматкерлери ошол замат жерине барып, жарадар болгон канаттууну таап, андан ары реабилитациялоо үчүн Каракол шаарында жайгашкан "Бугу-Эне" зоопаркына өткөрүп беришкен.

"Бугу-Эне" зоопаркынын өкүлдөрү эс алуучуларга жана милиция кызматкерлерине ыкчам чара көрүп, канаттууларды сактап калууга жардам бергендиги үчүн ыраазычылык билдиришкен. Жабыркаган чоң баклан аттуу канаттуу зоопарктын адистеринин көзөмөлүндө болуп, ага керектүү жардам жана калыбына келтирүү шарттары берилет.