Муфтият дин кызматкерлеринин бирдиктүү формасынын дизайнына сынак жарыялады

Кыргызстан мусулмандарынын Дин башкармалыгы диний кызматкерлердин бирдиктүү формасынын дизайнына сынак жарыялады. Бул тууралуу бүгүн, 25-июлда Муфтияттан билдиришти.

Маалыматка караганда, дизайнды электрондук форматта жасап чыгуу зарыл.

Сынактын талаптары:

– дин кызматкерлеринин жайкы, күзгү, жана кышкы формаларынын дизайнын электрондук үлгүдө иштеп чыгуу;

– жайкы, күзгү жана кышкы формалардын кездемелеринин аталыштары жана түстөрү;

– расмий дин кызматкери, имамдар жана диний ишмердүүлүк жүргүзгөн жарандардын сый (параддык) кийими, ибадаттык кийиминин үлгүлөрүн иштеп чыгып, комиссияга сунуштоо;

– кыргыз колоритине жана өзгөчөлүктөрүнө (мисалы: орнаменти) төп келген же жакындатылган форматта иштелип чыккан болуусу зарыл;

– форма буга чейин журт башчы тарабынан демилгеленип, тиктирилип берилген формага үндөш болсо артыкчылык каралат;

– конкурс 25-июлдан 2-августка чейин жүргүзүлүп, үлгүлөр кабыл алынат. Тандоо 5-августта саат 10:00дө Муфтияттын жыйындар залында өтөт.

Ошондой эле сынактын катышуучулары байланыш телефондорун жана электрондук даректерин калтырууга тийиш.

Белгилей кетсек, дизайндын үлгүлөрү КМДБнын алдында түзүлгөн комиссия тарабынан жактырылып тандалып алынат жана жеңүүчүгө сыйлыктар берилет.