УКМК Айыл чарба министрлигинин эсепчисин кармады

Суу ресурстары, айыл чарба жана кайра иштетүү өнөр жай министрлигине караштуу ветеринардык кызматтын Бишкек башкармалыгынын эсепчиси кармалды. Бул тууралуу УКМК кабарлады.

Кечээ, 25–июлда "Опузалап пара талап кылуу" фактысы боюнча козголгон кылмыш ишинин алкагында, 40 миң сом өлчөмүндөгү паранын бир бөлүгүн алуу учурунда суу ресурстары, айыл чарба жана кайра иштетүү өнөр жай министрлигине караштуу ветеринардык кызматтын Бишкек башкармалыгынын эсепчиси М.Н.С. кармалып, УКМКнын убактылуу кармоочу жайына киргизилген.

"Көрсөтүлгөн акча каражаттары жүргүзүлгөн текшерүүнүн жыйынтыгы боюнча оң корутунду чыгаруу максатында кийин Эсептөө палатасынын кызматкерине өткөрүп берүүгө арналгангандыгы аныкталды. Учурда бул кылмышка тиешеси бар башка адамдарды аныктоо жана жоопкерчиликке тартуу иштери жүрүп жатат", - деп билдиришти УКМКдан.