Кемин районунда чиркөөнүн терезесин сындырган  адам аныкталды

Чүй облусунун Кемин районунда чиркөөнүн терезелерин сындырып, качып кеткен жаран кармалды. Бул туурасында кечээ, 27-июлда Чүй ОИИББнын басма сөз кызматы билдирди.

Маалымдалгандай, 24-июль күнү райондук милиция бөлүмүнө Кемин шаарынын тургундары арыз менен кайрылган. Анда Панфилов көчөсүндө жайгашкан чиркөөнүн терезелерин сындырган жаран тууралуу маалымдалган. Кошумча дагы 3 арыз келип түшкөн.

Бул факт боюнча кылымыш иши козголуп, 1977-жылы туулган И.Р. аттуу жаран кармалган.

Учурда тергөө иштери уланууда.

Айта кетсек, аталган райондогу чиркөөлөрдүн, жергиликтүүлөрдүн үйлөрүнүн терезелерин таш менен сындырып жаткандар туурасында тургундардын маселеси айрым ММКларда жарыяланып, Министрлер кабинетинин төрагасынын орун басары Эдиль Байсалов жеринен кабар алган.