Кыргыз-тажик чек арасынын канча пайызы такталып бүткөнү айтылды

Кыргызстан менен Тажикстан чек аранын 94 пайызын макулдашты. Бул тууралуу кечээ, 29-июлда Тажикстандын Жер башкаруу жана геодезия боюнча мамлекеттик комитетинин төрагасы Ориф Хожазода маалымат жыйында билдирди.

Анын айтымында, чек аранын талаштуу тилкелери боюнча маселени чечүү үчүн сүйлөшүүлөр уланып жатат.

"Кыргызстан менен Тажикстандын топографиялык топтору быйылкы жылдын алты айында 12 жолу жолугушуп, чек ара маселеси боюнча бир топ жетишкендиктерге жетти. Бул аралыкта 82,3 чакырым тилке такталды. Калган тилкелер боюнча өз ара натыйжалуу чечим кабыл алуу боюнча сүйлөшүүлөр уланып жатат. Эки тарап тең маселени консенсус жолу менен чечүүгө аракет кылууда", - деп белгиледи расмий өкүл.

Ошондой эле ал коопсуздукту камсыз кылуу жана чек араны тактоо иштерин ийгиликтүү аяктоо максатында сүйлөшүүлөр жөнүндө маалыматтар ачыкка чыгарылбай турганын билдирди.