Жатак-абактан качып кеткен “смотрящий” кармалды

КРнын ИИМдин уюшкан кылмыштуулукка каршы күрөшүү башкармалыктын (УККБ) кызматчылары жатак-абактан качып кеткен Бакыш Сакеевди кармады. Бул тууралуу 25-декабрда ИИМдин басма сөз кызматы билдирди.

Маалыматка ылайык, 49 жаштагы Бакыш Сакеев Камчы Көлбаевдин уюшкан кылмыштуу тобунун активдүү мүчөсү. Буга чейин бир нече жолу соттолгон жана “смотрящий” статусуна ээ. Анын жатак-абактан качып кетүү фактысы жаза өтөөчү жайларды текшерип жаткан кезде аныкталды. Качуу фактысы боюнча ИИМдин УККБсы материалдарды чогултту жана аларды түзөтүү абактагы мыйзамды көзөмөлдөөчү прокурорго тапшырды. Материалдардын негизинде прокуратура “Эркиндиктен ажыратуучу жайдан же камактан качуу” беренеси боюнча кылмыш ишин козгоду.

Жакынкы күндөрдө ыкчам-издѳѳ иштеринин негизинде Бакыш Сакеевдин турган жери аныкталып, кармалды. Учурда ал ШИИБдин түзѳтүү-тарбиялоо абагына камалды.