Мунарбек Сейитбек уулу: "Кыргызстанга алтын медаль алып барганга аракет кылам"

Кыргыз мушкери Мунарбек Сейитбек уулу Париж шаарында өтүп жаткан Жайкы Олимпиада оюндарынын жарым финалына чыккандан кийин Кыргызстандын Олимпиадалык курама командасынын расмий маалымат каналына кыскача маек берип, таасирлери менен бөлүштү.

Анда ал атаандашын жеңүү оңой болбогонун айткан.

"Мыкты атаандаш болду, анткени ал дүйнө чемпиону. Ал дагы аракет кылды, бирок жеңиш биз тарапта болду", - деди спортчу.

Ошондой эле ал Олимпиада оюндарынан алтын байге алууга аракет кыларын билдирген.

"Биз жарым финалга чыктык, бирок муну менен токтоп калбастан бардык аракеттерди жасайбыз. Жарым финалда, финалда жеңишке жетип, Кыргызстанга алтын медаль алып барганга аракет кылабыз", - деген мушкер.

Белгилей кетсек, бокс боюнча 57 килограммга чейинки салмакта катышкан Мунарбек Сейитбек уулу алгачкы жүрүшүн 1/8 финалда баштаган. Анда кубалык Орта Родригез менен беттешип, 3:2 эсебинде атаандашын жеңип, чейрек финалга чыккан.

Чейрек финалда кыргыз мушкери 2021-жылы дүйнө чемпиону болгон америкалык Жамал Харви менен беттешип, аны дагы 3:2 эсебинде жеңди.